19 Tetor 2026

Në mëngjes, Edi Rama tha se nuk largohet sepse “nuk është pushteti im këtu në lojë, është tryeza e negociatave në BE”. Pasdite, vizita zyrtare në një kryeqytet të BE-së, e planifikuar për të nesërmen, u anulua. Jo nga Vjena, por nga vetë pala shqiptare.

Kancelaria federale e Austrisë njoftoi në orën 15:11 të së dielës se vizita e kryeministrit shqiptar te kancelari Christian Stocker, e caktuar për të hënën, 19 tetor, “u anulua nga pala shqiptare”. Vizita ishte njoftuar më 15 tetor, me pritje me nderime ushtarake në Ballhausplatz. Njoftimi austriak nuk jep arsye. Kryeministria e ka konfirmuar anulimin; sipas raportimeve që citojnë burime brenda saj, shkaku është përshkallëzimi i protestave në Tiranë.

Austria nuk është ndalesë protokollare. Sipas medias austriake, është investitori i gjashtë i huaj në Shqipëri. Dhe si çdo shtet anëtar, ka votë në çdo hap të negociatave: kapitujt hapen dhe mbyllen vetëm me pëlqimin e të 27 shteteve.

Argumenti i Ramës kundër dorëheqjes është se largimi i qeverisë tani do ta dëmtonte procesin europian. “Negociatat janë deri në vitin 2027”, tha ai. Në këtë logjikë, qëndrimi i qeverisë është garancia e tryezës.

Anulimi i së hënës e vë këtë premisë në provë. Agjenda europiane po pëson tashmë, jo nga një dorëheqje, por nga një krizë që qeveria nuk po e lë dot pas në Tiranë as për një ditë. Diplomacia që Rama e përdor si arsye për të qëndruar është e para që po paguan për gjashtë ditët e trazirave.  Ngrihu media

Nëse qëndrimi i qeverisë është garancia e procesit europian, pse takimi i parë europian i javës u anulua nga vetë qeveria?

Tryezën e Brukselit kryeministri e përmend çdo mëngjes; karrigen në Vjenë e la bosh.